Studentessa alla fermata del bus

Südtirol Pass abo+

Se usé abenëura: la curiera y la ferata te mëina dloncora

L Südtirol Pass abo+ ie na cherta de viac anuela persunela y eletronica per sculées y sculeies, lerneres y lerneri y studëntes y studënc. Paian na chëuta anuela fissa possel unì adurvà a na maniera flessibla y zënza limitazion te dut l raion dl trasport publich local südtirolmubiltà y sun la ferates regiuneles nchin a Trënt.

Abo+ da d’instà: Studëntes y studënc che ie tl Südtirol mé ti mënsc da d’instà possa se damandé l abo+ da d’instà. Chësc ie da giapé a n priesc arbassà y vel per i mënsc de juni, lugio, agost y setëmber.

Sce n uel se nuzé l abo+ per i viages cun la ferata sun la trasses Prëner-Dispruch y Sanciana-Lienz, sce n uel tò pea la roda- o n tier o sce n uel furné cun n Nightliner possel unì ativà i servijes de njonta a paiamënt. L abo+ ne vel nia per viages cun la ferates a destanza longia. L  Südtirol Pass abo+ muessa unì cunvalidà dan uni viac. Per jëunes y jëuni dai 14 ani insù vel l regulamënt che pra i viages cun la curiera y cun la ferata iel da tò pea n documënt de identificazion che ie da mustré ca sce damandà.

Se damandé o renuvé l Südtirol Pass abo+

abo+ da d’instà – duta la nfurmazions

Cosć y priejes de viac

Per l Südtirol Pass abo+ iel mé da paië na soma anuela, i viages nstësc ie debant. L tleca fé l check-in.

Spëisa anuela de 20 Euro:

  • sculées y sculeies dla scoles elementera, mesana y auta
  • chi che fej na scola prufesciunela a tëmp plën
  • persones che fej na furmazion de basa tl ciamp soziel
  • lerneres y lerneri sota i 18 ani che frecuentea na scola prufesciunela.

Spëisa anuela 150 Euro:

  • studëntes y studënc universiteres
  • lerneres y lerneri sëura 18 ani
  • sculées y sculëies da sëira
  • persones che frecuentea na furmazion d’acumpaniamënt prufesciunel de basa tl ciamp sozel
Damandé l Südtirol Pass abo+ online: chi, can, co?

Se damandé l Südtirol Pass abo+ possa sculées, sculeies y studëntes y studënc

  • che ne à mo nia cumplì 28 ani,
  • che à la residënza tl Südtirol y/o che frecuentea na istituzion de furmazion tl Südtirol,
  • che studiea tlo o che tol pert tlo te na furmazion de basa tl ciamp soziel.
  • mutons y mutans y jëuni y jëunes che viv oradecà, che à la zitadinanza taliana y che ie scric ite tl register A.I.R.E. de n chemun dl Südtirol. L abo+ possa te chësc cajo unì damandà tl suedtirolpass@suedtirolmobil.info

Per chi che ne à mo nia cumplì 18 ani ie la dumanda per la prima emiscion y per l renuvamënt dla cherta da fé dai genitores o dala persones che à la rejon d’educazion. Jëunes y jëuni dai 18 ani insù fej la dumanda online a si inuem.
Prëibel metëde verda: na dumanda bele mandeda ite ne possa nia plu unì retrata.

abo+ per sculées y sculeies: La dumanda de prima emiscion y de renuvamënt anuel possa for unì fata tl tëmp dal prim de mei nchin ai 31 de dezëmber o respetivamënter nchin a i 31 de merz dl ann do.

abo+ per studënc y studëntes: Per l Südtirol Pass abo+ di studënc y dla studëntes universiteres ne iel degun termin fis per fé dumanda. Chisc abo+ possa unì damandei o renuvei canche n uel. I vel 380 dis da canche n à fat dumanda.

Sce la scola frecuenteda ne ëssa ntan che n fej la dumanda online nia da cumparì tl sistem possa la registrazion de chësta unì damandeda tlican “Anfrage um Registrierung des Instituts”. Pernanche la scola ie unida regsitreda vën la persona curespundenta nfurmeda tres na e-mail y la possa jì inant a fé la dumanda.

La dumanda y l renuvamënt anuel dl Südtirol Pass abo+ coche nce la nuzeda di servijes online cunliei limpea possa unì fac sibe cun che nce zënza la tle d’azes digitela (SPID o cherta servijes ativeda cun letëur).

Se damandé o renuvé l Südtirol Pass abo+

Paiamënt dla spëisa anuela
  • Orden permanënt tres scudimënt bancher (SEPA Direct Debit);
  • Canche n fej dumanda tres cherta de credit (Visa / Mastercard) / pagoPA (l possa unì a se l dé spëises);
  • Te n segondo var tres cherta de credit (Visa / Mastercard) / pagoPA (l possa unì a se l dé spëises) dal cont de nuzeda persunel o tres home-banking per la banches autorisedes (mé sce l ie bele n Südtirol Pass abo+) y nia tres trasferimënt bancher;
  • Paiamënt diret pra la purteles de veduda de chertes autorisedes: te chësc cajo iel da prejenté l abo+.

Dan che l abo+ vën adurvà l prim iede ne iel nia de bujën de l ativé, ma l muessa unì fat l paiamënt dla spëisa anuela.

Cont de nuzeda online

Canche n fej dumanda possen se njinië ite n cont de nuzeda persunel tres chël che n possa azeder a chisc servijes online:

  • cuntrolé l status dla cherta Südtirol Pass abo+;
  • cuntrolé viages fac eventualmënter cun servijes de njonta a paiamënt;
  • mudé la modalità de paiamënt;
  • ativé/dejativé servijes de njonta a paimënt;
  • se damandé n duplicat o bloché la cherta;
  • mudé y atualisé i dac anagrafics.

Südtirol Pass Portal

Nutificazion dl abo+

La chertes abo+, che vën dates ora per l prim iede, vën partides ora dala scoles o dai secretariac dla scoles.
Chi che frecuenta na università o na scola ora dla provinzia de Bulsan possa crì ora pra la dumanda online ulache la cherta dëssa unì data ora.

Validità dl abo+

abo+ per sculées y sculeies: L di canche scumëncia la validità dl Südtirol Pass abo+ per sculées y sculeies ie uni ann i 15 de setëmber. L slungiamënt anuel online y l paiamënt dla chëuta anuela per l ann de scola che vën possa po for bele unì fac abenëura dal prim de mei inant.
Sce l abo+ vën damandà da nuef possel, do che l ie unì paià la chëuta anuela, unì adurvà l plu abenëura dal prim de setëmber inant. L abo+ vel pona nchin ai 15 de setëmber dl ann do.

La validità de n Südtirol Pass abo+ che ne ie nia unì renuvà destoma cun i 15 de setëmber, l tiermul destumà vën scencajo mustrà su sun l display dl njin de cunvalidazion.
Sce l slungiamënt anuel ie unì damandà ma mo nia paià pona cumparëscel sun l display dl cunvalidadëur do i 16 de setëmber la scrita “Euro 0” (“soma cunsumeda”), la cherta vën blocheda y la possa permò unì adurveda do che la spëisa anuela ie unida paieda.

abo+ per studënc y studëntes: Per l Südtirol Pass abo+ di studënc y dla studëntes universiteres ne iel degun termin fis per fé dumanda. Chisc abo+ possa unì damandei o renuvei canche n uel. I vel 380 dis da canche n à fat dumanda.

Cunvalidé / Registré l viac

Uni viac cun la curiera y cun la ferata ie da registré canche n sënta ite cun n check-in scëmpl tlican sun i njins de cunvalidazion brums, sce no ne vel la cherta nia. Per cunvalidé tlechel tenì la cherta abo+ permez al sensor.

Per viages cun la ferata: Sce n muda ferata cun na ferata de n cunliamënt ne iel nia de bujën de cunvalidé mo n iede l viac tla stazion te chëla che n muda la ferata. Chiche furnea cun l Südtirol Pass abo+ cun na ferata regiunela dal sud de Trënt de viers de Bulsan y che à na cherta de viac valeivla per la trassa nchin a Trënt ne muessa nia cunvalidé si abunamënt per furné inant de viers dl Südtirol.
Trassa dla ferata Dispruch-Prëner y Lienz-Sanciana: Tla stazions Dispruch, Sillian y Lienz iel la puscibiltà de fé bele la cunvalidazion cun validità a pië via dala stazion dl Prëner o dala stazion stazion. Per la trassa austriaca iel da fé na cherta aposta.

Se damandé n duplicat

Sce n pierd o se ruina l Südtirol Pass abo+ o sce la vën rubeda, possen se damandé n duplicat. Chësc costa 20 Euro.
Sce n ne vëij degun dann pra l Südtirol Pass abo+, ma la cherta ne funzionea nia pervia de n defet o ajache l material ie cunsumà, possen se damandé na copia debant pra la lueges de venduda südtirolmubiltà.
L duplicat possa unì damandà nsci (dajan sëura la luegia ulache n uel jì a se l tò):

  • da un di genitores o dal sculé che à cumplì 18 ani online tres l cont de nuzeda persunel
  • tres l secretariat dla scola curespundënt (tl Südtirol)
  • tres l Zёnter de servisc y nfurmazion südtirolmubiltà  +39 0471 220 880 (dal lunesc al vënerdì: dala 8:00 ala 18:00);
  • pra la purteles de venduda de chertes de viac südtirolmubiltà y pra la lueges de venduda autorisedes
  • sculées y sculeies che frecuentea na scola che ne ie nia tla provinzia de Bulsan y studëntes y studënc universiteres va a se tò l duplicat pra la luegia de venduda autoriseda.

Paiamënt dl duplicat:
Sce n paia tres SEPA Direct Debit ie la spëises per l duplicat da udëi tla prima conta che vën.
L duplicat possa nce unì paià tl tëmp de 15 dis pra una dla lueges de venduda südtirolmubiltà; sce no vën la cherta blocheda.

Tl cajo de n cuntrol: prëibel mëter verda!

L Südtirol Pass abo+ ie na cherta de viac persunela y a inuem che ie da cunvalidé dan uni viac y che ne daussa nia unì dat inant a d’autra persones. Jëunes y jëuni dai 14 ani insù muessa tl cajo de n cuntrol nce mustré ca si cherta d’identità che vel sce i vën damandei dal personal de cuntrol. Sce l Südtirol Pass abo+ ne possa per ce rejon che mei nia unì mustrà ca (ajache l ie p.ej. unì desmincià o perdù) muessa l passajir/la passajira cumpré na cherta de viac che vel.
Sce l abo+ vën meladurvà vëniel debota trat ite. L assessëur provinziel cumpetënt dezid tan giut che la cherta vën tenida ite). Te chësc tëmp ne possel no unì damandà n Südtirol Pass abo+ nuef no n duplicat.

L Südtirol Pass abo+ cun funzion de paiamënt ativeda

Sce n uel possel unì juntà sun uni Südtirol Pass abo+ na funzion de paiamënt per servijes sëuraprò, sibe coche cherta prepaid da ciarië su o cun detrazion direta dal contcurënt bancher. N possa paië limpea:

  • la tarifa dl di per tò pea la roda
  • i priejes de viac per tò pea tieres
  • viages cun la curieres Nightliner (ala tarifa Nightliner)
  • viages cun la ferates regiuneles Prëner-Dispruch y Sanciana-Lienz. Te chisc caji iel per la trasses austriaches da paië la tarifa dla VVT / ÖBB; chi che à na cherta vantaje dla ÖBB (ÖBB-Vorteilscard) possa la registré sun si cont de nuzeda online y se nuzé nsci dla tarifa alesireda.

Cunvalidé: Per l Südtirol Pass abo+ cun funzion de paiamënt ativeda velel, canche n fej la cunvalidazion, la medema cundizions de nuzeda coche pra l Südtirol Pass scëmpl. Dantaldut per viages cun la ferates regiuneles iel de mpurtanza, canche l vën fat la cunvalidazion, dé ite y cunfermé nce l numer de codesc dla stazion de destinazion; sce no ne vel la cunvalidazion y cundechël nce la cherta de viac nia.

Südtirol Pass Portal

Pass de scola
Cherta de viac: da cësa ala scola o tla istituzions prutejedes.
Mo d'autra nfurmazions
Südtirol Pass: la cherta de viac per duc y per dut
Südtirol Pass | abo+ | 65+ | free | Euregio Family Pass
Mo d'autra nfurmazions

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.