Istruzion per la cunvalidazion contactless
Co fé: l check-in cun l südtirolmubiltà Pass y la chertes de viac contactless
I njins brums de cunvalidazion südtirolmubiltà ie nluegei tla curieres y tla stazions. Pra chisc possen cunvalidé sibe la chertes de viac cun QR-Code sibe nce la chertes de viac contactles.
Mobilcard y la variantes defrëntes dl Südtirol Guest Pass: Cun chësta chertes de viac contactless bastel tenì permez la cherta al sensor (check-in) dan uni viac cun la curiera o la ferata y l ne ie nia de bujën de dé ite n luech de destinazion.
L tleca tenì la cherta permez al sensor (check-in) dan uni viac cun la curiera o la ferata. L ne ie nia de bujën de dé ite n luech de destinazion. Pra i viages cun la ferata iel n valguna ezezions:
Viages de cunliamënt cun la ferata: Sce n va diretamënter da na ferata te n’autra ne iel nia de bujën de fé mo na cunvalidazion tla stazion curespundënta.
Cunvalidazion tla stazion de Trënt: Passajires cun l südtirolmubiltà 65+ Pass y l U19 zënza funzion de paiamënt ativeda y passajires cun l südtirolmubiltà 365 Free che pëia via da na stazion a sud de Trënt y à na cherta per la ferata regulera nchin Trënt ne muessa nia unì ora tla stazion de Trënt per fé la cunvalidazion per pudëi furné inant tla direzion dl Südtirol.
D’autra indicazions
Passajires cun l südtirolmubiltà 365 Free che ne possa nia fé la cunvalidazion da sëui/sëules à la puscibiltà de detlaré chësc canche i/les se damanda la cherta y nsci iesi/ieles delibredes dal duvier de cunvalidazion.
Per passajires cun l U19 y cun l südtirolmubiltà 65+ Pass cun funzion de paiamënt ativeda velel pra la cunvalidazion la medema despusizions coche pra l südtirolmubiltà Flex Pass.
Passajires cun l südtirolmubiltà Flex Pass y FlexFamily Pass paia l priesc per uni trassa furneda perchël vala de tenì cont de chësc:
Curieres regiuneles y Citybus coche nce duta la curieres dla Sasa cun n numer de linia de trëi zifres: check-in a senté ite y check-out a unì ora. Sce l mancia l check-out vëniel trat ju per l viac duta la trassa nchin pra l’ultima fermeda.
Curieres che va mé tl raion dl luech, chël ie la curieres dla Sasa cun numeri de linia de doi zifres y n valgun Citybus locai: l tleca fé l check-in. Sce n muda la curiera muessen sun l’autra curiera inò fé l check-in per se registré. Per i viages tl raion dl luech tl tëmp de 60 menuc vëniel ratà l priesc de n viac sëul.
Furnadoies südtirolmubiltà: l ie mé de bujën de fé n check-in (tenì l südtirolmubiltà Pass permez al sensor).
Sce n tol pea la roda o n tier iel da fé mo na cunvalidazion:
- tenì mo n iede l südtirolmubiltà Pass permez al sensor
- tliché l simbul curespundënt
- tenì l südtirolmubiltà Pass mo n iede permez al sensor per cunfermé
Cunvalidazion tla stazions
Pra viages cun la ferata y cun la ferata a scines strëntes dl Renon iel nce de bujën de dé sëura l codesc dla stazion de destinazion; sce no ne vel la cherta de viac tl cajo de n cuntrol nia. La cunvalidazion vën fata nsci:
- tenì l südtirolmubiltà Pass permez al sensor,
- dé ite l codesc dla stazion de destinazion o cunfermé la pruposta dla stazion de destinazion,
- tenì l südtirolmubiltà Pass permez al sensor per cunfermé.
Anulé la cunvalidazion: sce n ne uel mpo no fé l viac possa la cunvalidazion bele fata unì anuleda tl tëmp de 45 menuc tla medema stazion a chësta maniera:
- tenì permez l südtirolmubiltà Pass al sensor,
- tliché l simbul „Südtirol Pass straicà tres“,
- tenì l südtirolmubiltà Pass inò permez al sensor per cunfermé.