L Südtirol Pass
Cun una na cherta – dut l Südtirol te fuia
L Südtirol Pass ie na cherta de viac eletronica che possa unì adurveda coche abunamënt per dut l ann per duc i mesuns de trasport publics tl Südtirol.
L prinzip: Plu chilometri che n furnea tl tëmp de n ann y plu a bon marcià che la tarifa chilometrica sarà. L priesc per uni viac vën ratà automaticamënter pra la cunvalidazion aldò dla sort de cherta: o tres detrazion periodica diretamënter dal cont bancher o tres detrazion de uni viac dala soma ciarieda su.
Saurì da adurvé y flessibl:
- te dut l raion dl trasport publich südtirolmubiltà cun leprò nce la ferates regiuneles nchin a Trënt;
- ala tarifa VVT / ÖBB nce sun la trasses dla ferata Prëner-Dispruch y Sanciana/Vierschach-Lienz; sce n uel possen registré la cherta de vantaje dla ÖBB (ÖBB-Vorteilscard);
- per tré ju la tarifa per n di sce n tol pea la roda;
- per tré ju l priesc dl viac sce n tol pea n tier;
- per viages cun la curieres Nightliner.
La cherta ne possa nia unì adurveda per viages cun ferates a destanza longia (EC, Freccia, Italo, Railjet y nsci inant).
L Südtirol Pass possa unì damandà online da persones cun n numer de codesc fischel talian che ie residëntes tla Union Europeica o tla Svizera o che lëura, va a scola o studieia tla provinzia de Bulsan.
L priesc per n viac cun la curiera o la ferata vën a se l dé dai chilometri furnei y l priesc dl livel tarifer curespundënt. Via per l ann, cun l se amudlé di chilometri furnei, vëniel aplicà var do var 5 livei tariferes cun n priesc chilometrich che se arbassea man man. Cun uni ann de referimënt (for dala data dla prima ativazion dl Südtirol Pass) vën l cont chilometrich dl Südtirol Pass metù a nul y l scumëncia inò l livel tarifer 1.
L priesc di viages vën calculà nsci:
| Livel tarifer | Chilometri furnei te n ann | Priesc de viac ala tarifa chilometrica |
|---|---|---|
| 1 | 1 a 1.000 km | 12 Cent |
| 2 | 1.001 a 2.000 km | 8 Cent |
| 3 | 2.001 a 10.000 km | 3 Cent |
| 4 | 10.001 a 20.000 km | 2 Cent |
| 5 | da 20.001 km | 0 Cent |
| Soma mascima al ann | 640 Euro |
L priesc minim per uni viac curespuend a 10 km tariferes. Per viages de cunliamënt cun curieres te duc i luesc ora che Bulsan y Maran vëniel ratà n priesc minim de 5 km tariferes.
Curieres de zità Bulsan y Maran coche nce Citybus: duc i viages tl tëmp de 60 menuc tla medema zona tarifera vën cunscidrei sciche n viac sëul.
Tarifa al di de al plu 15 Euro: Per i viages fac dai passajires vëniel trat ju al plu 15 Euro al di. Sëuraprò vëniel sce n cajo nce ratà l priesc de viages sun la trasses dla ferata Prëner-Dispruch y Sanciana-Lienz, l priesc de viages cun i Nightliner o chël dl cost tl cajo che n tol pea na roda o de n tier.
L Südtirol Pass possa unì damadà sun chësta plata web. N adrova:
- i dac persunei dla persona che fej dumanda
- n numer de codesc fischel dla Talia *
- na copia digitela (fotografia) dla cherta d’identità
- la coordinedes bancheres (IBAN, SWIFT / BIC Code, banca y filiela) per chëi tlienc che uel paië si viages tres paiamënt bancher
* Chi che ne à degun codesc fischel dla Talia possa se l damandé pra l’Agenzia dla Ntredes
Pra la dumanda online possel nce unì adurvà na tle d’azes digitela (SPID o cherta servijes ativeda cun letëur). Pernanche l SPID o la cherta servijes per i servijes online dl Südtirol Pass vën nuzeda ie l azes al cont de nuzeda dadedò mé plu puscibl cun la tle d’azes digitela.
Canche n fej la dumanda iel da dé sëura l cuntat per la nfurmazions che n uel (SMS o e-mail) y la maniera de paiamënt: cherta postpaid (chësta maniera vën cunsieda ajache i viages fac possa unì trac ju saurì dal cont dla banca) o cherta prepaid (che ie da ciarië regulermënter cun na cërta soma de scioldi).
Do che n l à damandà vën l Südtirol Pass mandà a cësa per posta adum cun na plata de nfurmazion per l’ativazion y la nuzeda dla cherta.
N cunsiëia de se njinië ite bel debota n cont de nuzeda persunel online canche n fej la dumanda. Tres chësc portal possa i passajires dejëujer duc i servijes digitei che à da nfé cun l Südtirol Pass y for vester nfurmei sun i viages fac cun la curieres y la ferates, sun l cont persunel di chilometri fac, sun la tarifa atuela, sun i ciariamënc fac o sun contes dl Südtirol Pass giapedes. Oradechël possen, scencajo che l fossa suzedù vel’ fal tla calculazion o tl’atribuzion de viages, fé na retlamazion acioche l fal vënie cumedà.
L Südtirol Pass vën mandà a cësa per posta do che l ie unì fat dumanda online. Dan che n l’adrova per l prim iede muessen l ativé (Freischaltung):
- online tres l cont de nuzeda persunel dajan sëura l numer dl Südtirol Pass;
- pra la purteles de venduda de chertes autorisedes y pra la lueges de venduda südtirolmubiltà;
- tres telefon pra l Zёnter de servisc y nfurmazion südtirolmubiltà +39 0471 220 880 (lunesc – vënerdì dala 8:00 ala 18:00). Da dé sëura ie l numer dl Südtirol Pass y l numer de codesc fischel.
L possa datrai duré n valgun’ ëura nchin che l’ativazion vën registreda te dut l sistem di dac y nchin che l Südtirol Pass nuef possa unì adurvà.
Pra l Südtirol Pass cun cuntrat postpaid (SEPA Direct Debit) vën la spëises de viac trates ju dal cont de banca uni doi mënsc, tl cajo de somes de ndut manco de 10 euro uni cater mënsc.
La maniera de co giapé la conta possa unì crissa ora sun l cont de nuzeda y mudeda canche mei: Giapé la conta sun l cont de nuzeda online ie debant. Giapé la conta per posta, sce n uel cun la lista di viages fac, costa 2 euro per conta.
L Südtirol Pass (cherta prepaid) possa unì ciarià nsci:
- tres cherta de credit (Visa o Mastercard) / pagoPA (l possa unì a se l dé spëises) tres l cont de nuzeda persunel online o tres homebanking (vel mé per la banches autorisedes);
- pra duta la purteles y lueges de venduda de chertes de viac südtirolmubiltà;
- pra i automac de venduda de chertes de viac;
- sun la curieres regiuneles; te chësc cajo possel duré n valgun dis nchin che l ciariamënt ie unì registrà; ma l Südtirol Pass possa mpo unì adurvà.
Valor de ciarieda: almanco 20 Euro.
Rest minim ciarià su: 10 Euro; sce n va sota chësc rest vëniel senialà sun l display pra la cunvalidazion per nfurmé che l rest va a piz.
Sce l rest sun la cherta ie manco che nul Euro (saldo negatif) ne possa l Südtirol Pass nia plu unì ciarià su tla curiera. L valor de ciariamënt minim ie te chësc cajo de 30 Euro (20 Euro plus 10 Euro de rest ciarià minim).
L Südtirol Pass vel per n ann do la prima cunvalidazion. Do che l ann ie passà vën la validità slungëda automaticamënter de mo n ann cun la prima cunvalidazion. L cont chilometrich dl Südtirol Pass vën cun uni ann de referimënt nuef metù a nul y l scumëncia inò l prim livel tarifer.
Sce l Südtirol Pass ne vën nia adurvà per dut n ann de validità vëniel deativà d’ufize. Na reativazion plu tert ie fo inò puscibla: prëibel cuntatëde per chësc fin l zënter de servisc y nfurmazion sot al numer: n. 0471 220 880 o tres e-mail contact@suedtirolmobil.info
Coche genitores o persones cun dërt d’educazion de mutons y mutans sot ai 18 ani à i pussessëures de n Südtirol Pass la rejon de tarifes dl Südtirol Pass arbassedes y i possa se damandé online l Euregio Family Pass. La cherta de viac nueva vën data ora y mandeda a cësa debant. Duc i dac, l cont chilometrich y nsci inant vën sëurantëuc automaticamënter sun la cherta nueva; l vedl Südtirol Pass vën dejativà.
Sce n se pierd la cherta dl Südtirol Pass, sce la vën rubeda o sce n vëij che la ie danejeda possen se damandé n duplicat per l priesc de 20 Euro, y chël:
- online tres l cont de nuzeda persunel;
- pra la purteles y lueges de venduda südtirolmubiltà;
- tres telefon pra l Zёnter de servisc y nfurmazion südtirolmubiltà sot al numer +39 0471 220 880 (lunesc – vënerdì: dala 8:00 ala 18:00).
Metëde verda: La dumanda ne possa nia unì trata zeruch.
Sce n ne vëij pra la cherta dl Südtirol Pass degun dann ma la cherta ne funzionea nia pervia de n defet o l deslisamënt dl material possen se damandé pra la lueges de venduda südtirolmubiltà na copia dla cherta. Chësta ie debant.
.