Toma pa fora incö osta ferata? Pëia pa ia osc bus, da indoman inant, cin’ menüc denant? Cun les notizies-push de südtirolmubiltà ciafëise sëgn belatira les informaziuns por ci che reverda les linies dl bus y dla ferata che chirise fora, ostes fermades y döt ci che al foss bun da savëi dla mobilité publica.
Dal scomenciamënt de forá, cun la proscima atualisaziun dl’app südtirolmubiltà, éra tan inant: al bastará n’odlada sön osc smartphone por gní alsavëi adora assá sce al se müda i orars dles linies che i ëis chirí fora, sce al toma fora val’ bus o ferata o sce al é interuziuns de val’ sort. I ves informarun ince sce i mesi de trasport publich ne se archita nia temporaneamënter pro osta fermada o sce al se müda valch pro le Südtirol Pass o tl trasport local publich. I podëis s’aboné, sides sön chësta plata web co tl’app, ales informaziuns te osc profil personal; al tleca cliché sön le simbol söinsom a man dërta.
Ti agn passá él gnü amplié de cotan les ofertes tl trasport local publich y sëgn dessel gní mioré cualitativamënter y amplié dantadöt les informaziuns por les porsones che s’anüza di mesi publics. Dötes les informaziuns sön la mobilité publica, tan inant che ares é desponibles, vëgn laurades fora tres le Zënter de sorvisc y informaziun nü de südtirolmubiltà y i partner dla mobilité, y gnará metüdes a desposiziun sciöche notizies atuales, dal lönesc al vëndres y, sce al é de majeres interuziuns, ince tratan le fin dl’edema. Les notizies-push nöies é porchël la proscima pera miliara y ares é nosc “contat diret” cun les passajieres y i passajiers y cun düc che che s’anüza de nüsc sorvisc. Al é anfat sce ara se trata de porsones che tol vigni de la ferata o le bus por jí a lauré, de studëntes o studënc o de porsones che adora ma datrai i mesi publics: ciafé informaziuns sigüdes é la cossa plü importanta tl trasport local publich. Che che vëgn informá adora assá se sparagna tëmp y ne mëss nia se dessené por nia.
Porchël ves dunse n consëi: Atualisede osta app y abonesse ales notizies-push che ves öga le plü. I ves lasciun alsavëi dötes les novités.