Che che oress fá n iade cun la ferata te n'atmosfera storica pó le fá en sabeda, ai 2 d'otober: dailó gnarál festejé i 150 agn dla ferata de Puster.
De novëmber dl 1871 jô en funziun la ferata de Puster, y plü avisa la linia danter Villach y Franzensfeste, sciöche pert dla ferata dl süd da inlaota tla monarchia imperiala y roiala (k.u.k). Le coliamënt dla ferata condejô defata adalerch tla valada de Puster na classa turistica nöia y te n valgügn posć gnôl tosc sö i pröms zëntri dl turism. Dal 1985 – 1989 gnô la linia dla ferata eletrificada, dal 2008 inant gnôl pormez, tl cheder de laurs de modernisaziun, punc d'incrujada nüs, ciamó d'atres staziuns d'architada, garnitöres dla ferata nöies y al metô man da jí na ferata vigni mesora.
Jí cun döt le tanf che vá
En sabeda, ai 2 d'otober mët a jí la STA – Strotöres de trasport dl Südtirol SpA y l'aziënda competënta taliana por la rëi dla ferata RFI na picia festa de iubileum por recordé n iade l'importanza storica y atuala dla ferata de Puster. Por chësta ocajiun él danterater ince gnü arjigné ca n pice liber da colorí che é bele gnü partí fora te chisc dis tles scolines y tles prömes döes classes dles scores elementares de Puster.
N highlight é la garnitöra storica dla ferata che vëgn metüda a desposiziun dala "Fondazione FS" por n iade spezial. Porchël jarára davëi "cun döt le tanf che vá" danmisdé - te trëi tapes - da Franzensfeste cina Sanciana, domisdé vëgnel fat le iade derevers a Franzensfeste te döes tapes.
Numer limité de porsones che pó tó pert - prenotaziun por trasses singoles
Deache a chësc iade spezial cun la ferata pól ma tó pert n numer limité de porsones mësson sambëgn te vigni caje se prenoté. Aladô dles desposiziuns Covid mësson se vistí te ferata la maschera chirurgica y che che á plü de 12 agn mëss ince avëi le zertificat Covid vërt (Green Pass).
Important: Al pó ma gní prenoté öna na trassa por alplü 4 porsones. An pó ma senté sön la ferata tla staziun chirida fora, chël ó dí a Franzensfeste, Bornech o Valsperch y por le iade derevers a Sanciana o Bornech.
Iade da jí danmisdé:
- Trassa Franzensfeste – Bornech (9.14 – 10.12)
- Trassa Bornech - Valsperch (10.48 – 11.37 Uhr)
- Trassa Valsperch - Sanciana (12.20 – 13.25 Uhr)
Iade derevers domisdé:
- Trassa Sanciana – Bornech (14.15 – 16.13 Uhr)
- Trassa Bornech - Franzensfeste (16.49 – 17.53)
Da fá le iade cun chësta ferata speziala ciafa les passajieres y i passajiers na cherta aposta che vel ma por la trassa prenotada. Le iade inant o derevers tla staziun da olache an é piá ia pó gní fat cun les ferates de Puster che vá regolarmënter; adorede por chësc le Südtirol Pass o na cherta südtirolmubiltà varënta.
Chiló podëise fá la prenotaziun y lí les condiziuns por tó pert.