N’aste nia ciamó daldöt fat fora ci fá vigni de d’isté? Dailó anüzete de to abo+ por n iade d'esploraziun ti museums dl Südtirol.
"Summer feat. Museum" é le moto dl isté di museums 2023. Mituns y mitans, jogn y jones cun n abo+ varënt pó s'anuzé dl'ocajiun da jí a esploré debann na gran varieté de museums dai 17 de jügn ai 4 de setëmber. La palëta di incër 40 museums che tol pert ala scomenciadia vá dal'atmosfera medievala de Ciastel Tirol y Ciastel Runkelstein ala creativité dl'ert contemporana metüda fora te Kunst Meran y tl Museion, cina ai raiuns alaleria dl Museum etnografich de Dietenheim, dl Museum provinzial dla ciacia y dla pëscia tl Ciastel Wolfsthurn a Mareit o dl Museum Passeier. Escurjiuns te n monn sot tera vëgn pitades dales mineores de Ridnaun y Prettau. Al paia ince la mëia da jí a vijité les costruziuns sacrales di Convënc de Neustift y Marienberg o le labirit gigantich dla Fortëza de Franzensfeste.
Che che se interessëia por la storia dles valades y di paisc pó jí a ti ciaré al Museum Gherdeina, al Museum Hoamet de Tramin o al Museum de Godun, deperpo che tl Museum Mansio Sebatum a San Laurënz án la poscibilité da se fá na idea dla colonisaziun di Romans dan da prësc 2000 agn. Ince tl Museum archeologich a ti ciaré a Ötzi y tl Museum de Sciënzes naturales a Balsan pón ite debann cun l'abo+. Al se paia ince da jí tl Museum di elms di stödafüch a Gais, tl Museum dla farmazia a Porsenú o tl Museum dla fruticoltöra a Lana.
Döta la lista di museums y di posć d'esposiziun che tol pert, y sambëgn dötes les informaziuns é da ciafé sot a chësc link
L'aziun vëgn promoiüda dal Ofize Museums y inrescida museala cun le sostëgn la Repartiziun provinziala Mobilité y la coordinaziun dla STA - Strotöres dl trasport dl Südtirol