Al é gnü surandé le frabicat prinzipal cun i ofizi, la portina dles chertes y le salf d'aspeta; la STA - Strotöres de trasport dl Südtirol SA sará responsabla dla gestiun. Cun le protocol de surandada ti á la sozieté dles ferates taliana RFI surandé dan da n valgügn dis dui frabicac dla staziun da Bornech ala Provinzia. La convenziun é gnüda sotescrita tla presënza dl assessur por la mobilité Daniel Alfreider, dl diretur de departimënt Martin Vallazza, dl responsabl de RFI por i frabicac dla staziun tl nord-ost dla Talia Giuseppe Brusamolin y dl ombolt da Bornech Roland Griessmair. "Cun la surandada di frabicac rovunse inant por ci che reverda la modernisaziun dles strotöres dla ferata tl Südtirol: chësc é n vare important ince en conscidraziun di laurs por le zënter de mobilité de Bornech" á alzé fora l'assessur Alfreider.
Brusamolin á sotrissé che RFI é a öna cun l'obietif dla modernisaziun dles strotöres dla ferata y laurará ti agn che vëgn inant por colié ciamó damí les staziuns de nosta provinzia ales cités tla Talia y ince foradecá. Le trasferimënt de strotöres á bele metü man dl 2005. Bele 26 strotöres dla ferata é gnüdes surandades cina sëgn tres convenziun da RFI ala Provinzia, sëgn ti tochera a chëres dla staziun da Bornech che é les plü importantes y les maius de Puster.
La STA gestësc dal 2020 incá i laurs de costruziun te döt l'areal dla staziun da Bornech. Al momënt vëgnel metü sö le frabicat d'aspeta zentral, dedô gnarál i box por les rodes; por l'aisciöda che vëgn dess i laurs gní stlüc jö. Le zënter de mobilité de Bornech vëgn realisé sön n areal de 22.100 metri cuadrac olache al s'incrujëia indöt 16 linies dl bus. Canche döt sará fat jarára da arjunje saurí la staziun da Bornech da cater azesc adatá, n sotpassaje nü y n punt. Le zënter de mobilité de Bornech vëgn finanzié cun le sostëgn dl Fonds europeich por le svilup regional EFRE. (LPA)