südtirolmubiltà Fix30 Pass

Cun sorvisc surapró él miné:

• les trasses regionales Prener-Desproch y Sanciana/Vierschach-Lienz,
• le trasport de rodes y de tiers,
• l'adoranza di bus Nightliner,
• i box dla roda,
• Park & Ride.

Le Fix30 tol ite la maiú pert di sorvisc de linia integrá (sciöche le schibus y i bus dles linies da d'isté). Sce al ess da ester ezeziuns vëgneres dades dant diretamënter tles ofertes sajonales.

Chësc Pass ne pó nia gní adoré por les ferates che vá lunc (EuroCity, InterCity, Frecce, Italo, Railjet).

Le Fix30 á na validité de 30 dis calendars y pó gní ativé y cumpré online canchessî. Al vel dal de dl'emisciun cina ales 23:59 dl ultimo de de validité.

Le Fix30 pó gní damané da:

• che che á la residënza te n stat comëmber dl'Uniun europeica o tla Svizera o se tëgn sö de regola tla provinzia de Balsan,
• che che á n codesc fiscal talian varënt.

I podëis cumpré le Fix30 online sön le sit südtirolmubiltà myportal.suedtirolmobil.

• Sce i ëis bele n account jide ite cun osta e-mail y la password.
• Sce i ëis n account mo i ne s'ëis ciamó mai anuzé dl portal, jide ite le pröm iade cun le numer dl Pass y le codesc fiscal y completede osc profil.
• Sce i sëis n anuzadú nü o n'anuzadëssa nöia, messëise ma ves registré cun osta e-mail y üsc dac personai.

Da osc account personal podëise manajé saurí üsc Pass y tigní sot a control ostes fatures. Implü podëise odëi te vigni momënt la lista di iadi che i ëis fat y i sorvisc eventuai surapró a paiamënt che i ëis adoré.

Vigni iade cun le bus y la ferata mëss gní registré cun n check-in tignin pormez le Pass al sensur dl aparat de convalidaziun. Sce i ne convalidëis nia, n'é osc Pass nia varënt.

Canche i fajëis n iade cun la ferata cun le Pass messëise ma le convalidé al scomenciamënt dl iade y nia vigni iade che i mudëis ferata; porchël sce i mudëis ferata tla medema staziun ne messëise nia convalidé ciamó n iade. Le medemo vel ince por che che á n U26 Pass y é sön na ferata regionala che vëgn da süd de Trënt cuntra Balsan cun na cherta varënta cina Trënt: a Trënt ne messëise nia gní fora dla ferata y jí a convalidé deache la cherta cür le iade cina dailó y da Trënt insö devers dl Südtirol vëgnel automaticamënter adoré le Pass.

Trassa dla ferata Desproch – Prener y Lienz – Sanciana: tles staziuns de Desproch, Sillian y Lienz él la poscibilité da convalidé le Pass che vel spo dales staziuns de Prener o de Sanciana. Por la trassa tl'Austria él da cumpré na cherta extra.