“Truep de nuef” iel da n lunesc, 7 de setëmber, pra l servisc Citybus a Persenon. A tëmp y ëura per l scumenciamënt dla scola vëniel reagì a na majera dumanda, l vën auzà la capazità y realisà i truep dejideres di nuzadëures di mesuns publics.
N detail sëuraprò: i orares possa vester scialdi adatabli. Mo puech dan che n ie piei via cun l cunzet nuef l àn “mo mpue miurà”. Tlo la nuviteies plu mpurtantes y la cumedures che ie mo unides fates tl ultim mumënt.
Cun plu che 500.000 ghesć al ann ie la linia 320.1 la linia plu nuzeda a Persenon y la vën mo putenzieda. Dal lunesc al vënerdì va la curieres tl ritm de 15 menuc, de sada y n pert nce de dumënia y n i dis de festa vales uni mes’ëura. I orares da sëira vën slungei nchin dala 22.35, da Milland iel n ritm de mes’ëura auternativamënter a Albeins y dal Zeffer.
Avis de cumedura: Autramënter che coche indicà tla brosciura di orares ie la prima partënza pra la stazion de Vahrn bele dala 5.58 mpede dala 6.28.
La trassa dla linia 320.2 mëina da Vahrn a Milland y da ilo auternativamënter uni ëura da Köstlan y tla Wolkensteinstraße. Na cossa nueva ie che i luesc de Vahrn y Neustift ie cunliei te tramedoi direzions. La fin dla linia a Vahrn ie l Kastanienwaldele, ulache l vën njinià ite na fermeda nueva. La stazion de Persenon ne vën per rejons de tëmp nia plu servida, ma perchël ie l cunliamënt cun la stazion śën garantì tres la linia 1 te n ritm de 15 menuc. Da d’ansciuda 2021 ie a Milland nce la curtina da arjonjer cun Citybus.
Avis de cumedura: Autramënter che coche l ie indicà tla brosciura di orares ie l terzo viac daduman 8 menuc plu abenëura (prima partënza a Vahrn dala 6.57 mpede dala 7.05).
D’autra nuviteies pra l cunzet dl Citybus a Persenon: La linia 320.3 vën spartida tla linies 320.3 (Haller – Mahr/zona industriela) y 320.4 (Burgfrieden – Seiserleite). Tlo iel da dì che i cunliamënc cun Burgfrieden vën ampliei. La linia nueva 320.4 va śën nce de dumënia y n i dis de festa.
L Citybus Persenon ie unì metù a jì d’autonn dl 2005. Da ntlëuta à la curieres Citybus abù for n majer suzes, si linies ie unides ampliedes y cun plu che 1 milion de nuzadëures al ann iel ncuei l servisc Citybus plu nuzà te duta la provinzia.