Sëgn él ince les assoziaziuns che pó damané do le Südtirol Pass business: al n'ó nia plü ester n numer de cuta söl valur ajunté.
Na bona pert dles porsones dl Südtirol se dá da fá te assoziaziuns y organisaziuns, y roda por cunt de chëstes - porleplü volontariamënter - fora por döt le teritore provinzial. Cun le Südtirol Pass business áres sëgn la poscibilité da paié diretamënter tres l'assoziaziun les spëises de iade cun i mesi dl trasport publich. Cina sëgn orôl ester na partida CVA por podëi damané online do le Südtirol Pass business y porchël é chësta cherta cina sëgn gnüda anuzada dantadöt da dites y aziëndes: dal ann passé, da canche ara é gnüda metüda sö, él gnü damané do plü co 600 Südtirol Pass business.
Rodé te na manira ecosostignibla por l'assoziaziun
Dites, aziëndes y sëgn ince assoziaziuns y organisaziuns desvalies pó fá domanda online da ciafé un o de plü Südtirol Pass business por sü colaboradus y sües colaboradësses o sü comëmbri y sües comëmbres sön chësta plata web. Le Südtirol Pass business pó gní adoré por iadi cun le bus y la ferata avisa sciöche le Südtirol Pass normal, ma cun chëstes desfarënzies:
Le Südtirol Pass business n'é nia na cherta personala: al vëgn relascé a inom dla firma o dl'assoziaziun y pó gní adoré alternativamënter da porsones desvalies.
Por i iadi cun le bus y la ferata tl raiun dl trasport integré südtirolmobil vëgnel calcolé tratan döt l'ann n prisc fis unitar de 0,12 euro por vigni chilometer tarifar.
Le Südtirol Pass business é ma da ciafé cun n contrat postpaid (SEPA Direct Debit); i cosć de iade vëgn trac jö periodicamënter dal cunt bancar y la faturaziun vëgn fata eletronicamënter tres SDI.
Chiló de plü informaziuns