Oreste fá n iade tl Trentin o tl Tirol cun tüa familia o cun amisc/amiches? Dailó chir fora la cherta por n de "Euregio 2 Plus": por 39 euro pó döes porsones adultes y trëi mituns/mitans rodé deboriada n de intier cun i mesi dl trasport publich te döta l'Euregio.
Ciodí pa orëi jí tres dalunc? Ince plü daimpró él tröp da odëi y che vá saurí da esploré zënza auto propi sëgn d'isté. Cun la cherta por n de Euregio 2 Plus pó cina 5 porsones – danter chëstes alplü 2 porsones adultes y 3 mituns/mitans sot a 15 agn - rodé deboriada n de intier cun i mesi dl trasport publich te döt le Südtirol, tl Bundesland Tirol y tl Trentin. Ara ne se trata nia de na cherta de familia, chël ó dí che les cin' porsones n'á nia bria da ester parentela.
Tl Südtirol vel la cherta por n de "Euregio 2 Plus" por dötes les ferates regionales, i bus de cité, i citybus y i bus regionai dl sistem dl trasport südtirolmubiltà, la furnadoia y la picia ferata dl Renon sciöche ince por la furnadoia dla Mendola. Tl Südtirol él da convalidé la cherta denanco senté sö sön vigni bus o ferata cun n check-in saurí. Ti paisc vijins Tirol y Trentin tlechel da mosté la cherta sce an vëgn damaná.
Tl Trentin pón tó la cherta dl'Euregio por i sorvisc de bus urbans y extra-urbans de Trentino Trasporti S.p.A., les ferates regionales dla linia dla ferata dl Prener cina Borghetto, le coliamëmt dla ferata Trënt – Malè y Trënt – Primolano (Valsugana), sciöche por la furnadoia Trënt – Sardagna.
Tl Bundesland Tirol pó la cherta dl'Euregio gní adorada te döta la rëi de linia dl Tirol y sön les linies ti raiuns de porte y che vá sura i confins fora aladô dles desposiziuns sön les tarifes dl VVT.
La cherta dl'Euregio ne pó nia gní adorada sön les ferates che vá plü lunc, les ferates dles rodes danter Sanciana y Lienz y le "bikebus" sön la linia dla ferata Valsugana y Trënt-Malè. Implü ne póra gnanca gní anuzada por les furnadoies da jí a Kohlern, Mölten, Vöran y Meransen y gnanca por les linies dl bus singoles ma de interes turistich. Pro la linia dl bus 273 vel la cherta Euregio por döta la trassa Mals – Nauders - Martina, pro la linia 811 por la trassa Mals cina Müstair/confin.
Orars:
https://fahrplan.vvt.at (Bundesland Tirol)
https://www.trentinotrasporti.it (Trentin)