1,5 milions de vijites dla plata web y n plazamënt danter la diesc apps dl Südtirol plu nuzedes. Chësc ie l prim bilanz anuel de nosc portal de mubiltà.
Bele l prim di dla publicazion dla verscion nueva de nosta plata web, ai 26 d’agost dl ann 2020, ti à passa 13.000 persones nteressedes dat na udleda. N cunfront cun la verscion da dant iel ntant unì leprò 670.000 utënc nueves. Mplu vëniel al mumënt registrà passa 7.000 vijites dla plata web y 30.000 crisses de orars de viac al di. Belau doi terc dla vijites reverda crisses de orars online. Suvënz vëniel nce cunsultà tabeles cun i orars de viac dla linies de curiera y de ferata singules. Chëstes vën daniëura atualisedes.
Plataforma per duc i servijes online che reverda l Südtirol Pass
La südtirolmubiltà ne ie nia mé la prima adres per cialé do orars de viac o per giapé nfurmazions che reverda la mubiltà publica tl Südtirol: tres l portal dl Südtirol Pass pieta la plata web nce na plataforma per duc i servijes online che reverda l Südtirol Pass y i abunamënc per l trafich local publich. Per i 100.000 Südirol Pass y Euregio Family Pass che vën nuzei ativamënter al mumënt vëniel registrà danter 30.000 y 40.000 logins al mëns al portal dl Südtirol Pass. De setëmber dl ann 2020 iel unì registrà 58.000 azesc – che ie stat l numer de azesc plu aut nchinamò. Nce i passa 73.000 abo+ per sculeies/sculées y studënc/studëntes vën renuvei o damandei da nuef tres la plata web uni ann al scumenciamënt dla scola.
N prim ann ntensif
Tl prim ann ons laurà per miuré y lauré ora nosta plata web y nosta app, les adatan ai mpulsc che on giapà da nosc tlienc y nosta tlientes y juntan funzions nueves. Mé per otimisé la app iel stat diesc release. Nuviteies ie per ejëmpl la ndicazions tl tëmp reél per ferates y la curieres dla Sasa, l numer sciazà de passajieres tla ferates regiuneles, l widget di orars per la plates web, na plata de nfurmazions per patins y la lista a pert per chëla curieres che va mé ntan i dis de scola. L ie nce unì realisà l dejidere de trueps de pudëi salvé tl format pfd i resultac dla crissa di orars online per i stampé o per se mëter adum nstësc n pitl liber persunel cun i orars de viac dla linies dla curieres y dla ferates crisses ora.
Una dla nuviteies plu mpurtantes ie la nutizies push, che n se possa abuné – for aldò de si bujën persunel – te si “profil” per uni linia dla curiera o dla ferata. A chësta maniera giapa passajieres automaticamënter duta la nutizies atueles che reverda la mubiltà publica o la linies y la fermedes crisses ora per resté nsci for nfurmei.
D’autra nuviteies
Tl tëmp che vën dëssa la usability unì otimiseda cun l design digitel nuef. Oradechël vëniel sun la cherta dl Südtirol juntà nfurmazions che reverda la mubiltà, per ejëmpl lueges de stazions da ciarië per mesuns de trasport eletrics y lueges per Carsharing, mé per n numiné n valgunes. N gran suzes ie nce l Mobile Ticketing, cun chël che l sarà tosc mesun cumpré chertes de viac online.
A uni moda: Gën te acumpanions inant ntan ti viajes, nes ncunferton for inò sun cumentares y te mbincion n bon viac!