Linea ferroviaria 200 Merano-Bolzano
Chiusura per lavori (fino al 16 luglio)
de plu nfurmazions
binari

Informaziuns por dötes les porsones che tol la ferata:

N valgönes interuziuns tl trafich dla ferata é bele sëgn sigüdes

De majeri laurs de costruziun y manutenziun sön les linies dla ferata vëgn programá bele cotan danfora. Chiló gnëise alsavëi ci laurs che é sön les program chësc ann.

La segurëza tira dant: Plü iadi al ann, sovënz la domënia danmisdé, fej la sozieté che gestësc la rëi dla ferata RFI controi tecnics sön la linia dla ferata de Puster y Maran. Les linies romagn porchël te chisc dis stlütes por n valgönes ores alalungia. Al vëgn dantadöt controlé i sistems de segurëza y la linia tl’aria, implü s’anüzon dla stlüta por fá de mëndri laurs de manutenziun dl’infrastrotöra dla ferata.

Invers sön la linia dl Prener él na "finestra de manutenziun" al de. Chësta locia ti orars tratan i dis da laur danmisdé vëgn adorada dala sozieté dla rëi dla ferata RFI por laurs de ispeziun y de manutenziun ordinars. Porvia dl trafich de marcianzia ne pól sön chësta assa de trafich prinzipala nia gní fat laurs de nöt, sciöche al vëgn porater fat sön la linia dla ferata dla Venosta.

Stlütes por manutenziun sön la linia de Puster y Maran

Por les stlütes de manutenziun regolares vëgnel poscibilmënter tut ca dis olache an sá che al é ma pücia jënt che adora la ferata. Les interuziuns te Puster gnará dant, aladô dl plann de laur dla sozieté dla rëi dla ferata, chëstes domënies danmisdé danter les 6:30 y les 13:30: ai 15 de jená, ai 26 de merz, ai 14 de ma, ai 23 de messé, ai 17 de setëmber y ai 19 de novëmber.

La linia de Maran resta temporaneamënter stlüta chëstes domënies: ai 12 de forá y ai 22 de otober danter les 9:00 y les 15:00 y ince ai 16 de aurí y ai 20 de agost danter les 9:00 y les 11:00.

Trassa dla ferata danter Balsan y Trënt: Al vëgn ressané i punc

Por i laurs de ressanamënt pro i punc dla ferata gnarál ince en chësc ann a se le dé n valgönes interuziuns tl toch danter Balsan y Trënt: aladô dl program de laur de RFI se tratera di dis dai 11 ai 12 de forá y dai 25 ai 26 de forá da sëra tert y de nöt. D'agost sarál spo de plü interuziuns sön toc dla ferata tl raiun sot Balsan; al gnará dé informaziuns plü avisa adora assá.

La ferata dla Venosta: I laurs por l'eletrificaziun vá inant

En chësc ann gnarál fat n gran vare cun i laurs de eletrificaziun dla ferata dla Venosta. Cina da d'altonn restará ciamó stlüt le toch danter Maran y Töll por ester bogn da porté a fin i laurs de adatamënt ti tuní dla ferata. Implü gnarál en chësc ann ince metü sö incër 1600 stanges por la linia tl'aria. Por che i laurs pois gní fac cun na certa continuité gnarál fat sté sö le trafich dla ferata da mez aurí les sabedes y les domënies sön döta la linia. Insciö vára da mantigní le coliamënt tratan i atri dis dl'edema por dötes les porsones che tol vigni de la ferata por laur y por i scolars y les scolares.

La furnadoia dl Renun y dla Mendola

I laurs de revijiun y de manutenziun scric dant dala lege pro la furnadoia dl Renun gnará fac dai 13 de merz al 1. de aurí y ince dai 7 ai 22 de novëmber. La furnadoia dla Mendola ne jará nia dai 13 ai 31 de merz y dai 13 de novëmber cina mez dezëmber porvia de laurs de revijiun.

Dagnora up to date!

Döt ne vára nia da programé y da preodëi! Te vigni caje: Tres nosta app y nosta plata web ves informunse sön dötes les interuziuns y i ves lasciun alsavëi sce ara sceca al ultimo momënt tl trasport local publich. Abonesse madër a nostes nozities-push por dötes les linies che ves interessëia. Insciö sarëise informá al miú sön üsc coliamënc dla ferata y dl bus y ince dagnora up to date!

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.