Dal 1 de jená dl 2026 sarál cotan plü saurí da rodé tl Tirol, tl Südtirol y tl Trentin. Cun l'Euregio Ticket nü él a desposiziun n abonamënt anual por dötes les porsones che vir, laora o é regolarmënter sön le iade tl'Euregio.
Da jená dl 2026 inant gnarál organisé danü la mobilité sura i confins provinziai fora: I sistems dl trasport che é bele vëgn coliá te na rëi unica. L'Euregio Ticket coliëia le südtirolmubiltà Fix365 Pass y le KlimaTicket Tirol te n su ticket – y fej fora de trëi raiuns n raiun dla mobilité che taca adöm. L'idea iadedô é avisa tan scëmpla co orientada al dagní: sön le iade zënza confins cun n su ticket.
N ticket, trëi raiuns
Cun l'Euregio Ticket éson sön le iade a na moda flessibla te düc trëi i raiuns – zënza mudé abonamënt y zënza messëi se fá pinsiers sön i confins aministratifs.
- Tl Südtirol él a desposiziun ferates regionales, bus urbans y extraurbans y les furnadoies plü importantes dla rëi südtirolmubiltà.
- Tl Tirol vel le ticket por döta la rëi dl VVT y tol ite i bus, i nightliner, les ferates regionales y cinamai ferates che vá lunc.
- Tl Trentin tochel lapró les ferates regionales, i bus y la furnadoia Trënt–Sardagna.
Insciö él danman n'oferta dla mobilité ampla, che fej a na moda che la vita da vigni de sides cotan plü saurida y scëmpla.
Le prisc dl abonamënt
L'Euregio Ticket costa 750 euro al ann. Aladô de olache l'abonamënt vëgn cumpré - tl Tirol o tl Südtirol - se müda la spartiziun interna di cosć ma de püch.
Can y co cumpré?
La prenotaziun pó gní fata online dai 15 de dezëmber dl 2025 inant sön le portal dl utënt de südtirolmubiltà.
Le ticket vel dal 1 de jená dl 2026 inant. Do che le ticket é gnü cumpré pól gní ortié a ciasa o an pó jí a le do te n punt de venüda de südtirolmubiltà.
Bun da savëi denanco pié ia
- L'Euregio Ticket é ma preodü por che che vir tl'Euregio.
- Al momënt n'él nia preodü reduziuns.
- Les metodes de convalidaziun y control depënn dala regiun, porchël ves aconsiunse da ves informé denanco pié ia.
- Por i studënc y les studëntes ti trëi raiuns él l'Euregio Ticket Students da 356 euro al ann.
Düc i detais ciafëise chiló: Euregio Ticket.