Bonus dl trasport: al funzionëia

Tröpes porsones che á le Südtirol Pass á bele ciafé le bonus

Prësc 1600 porsones che á le Südtirol Pass y l'abonamënt á cina sëgn bele fat domanda por ciafé le bonus dl trasport dal Stat y ala maiú pert ti él bele ince gnü acredité.

Sigü él che la cossa cun le bonus dl trasport da pert dl Stat funzionëia. Le team de südtirolmubiltà s'á dé da fá por che la clientela dl Südtirol Pass ciafes chësc sostëgn te na manira saurida y daldöt nia burocratica. Feter 1300 cliënc y cliëntes á ciafé ti ultimi dis le bonus de 60 o 20 euro. Por la maiú pert se tratera de porsones che á le Südtirol Pass o l' Euregio Family Pass, lapró él ince n pü' plü co 400 abo+ y ince n valgügn abonamënc 65+ . Do da n control intern, por la maiú pert por rajuns tecniches de dac, n'á n valgönes domandes nia podü gní tutes en conscidraziun.

Insciö röion pro le bonus

  • Südtirol Pass cun contrat postpaid (SEPA Direct Debit /Debit sön le cunt bancar): le bonus vëgn acredité sön le cunt dl utënt.
  • Südtirol Pass cun contrat prepaid: le bonus vëgn acredité diretamënter sön la cherta.
  • Südtirol Pass abo+ y 65+: le bonus vëgn acredité tres le cunt dl utënt y gnará trat jö le proscimo iade che al gnará paié ite le cost anual.

Tl cunt dl utënt personal sot a "Contrac > movimënc“pón odëi sce le bonus é gnü acredité.

Al pó gní fat domanda ciamó cina la fin dl ann

La domanda por le bonus dl trasport da pert dl Stat pó ciamó gní fata cina ai 31 de dezëmber dl 2022 y plü avisa online tres le portal www.bonustrasporti.lavoro.gov.it cun l'azes digital SPID o la cherta d'identité eletronica CIE. Le bonus pó ma gní adoré da cumpré n abonamënt por la mobilité publica y ne vëgn nia paié fora sön le cunt bancar.

Chiló ciafëise ciamó d’atres informaziuns.

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.