Linea ferroviaria 200 Merano-Bolzano
Chiusura per lavori (fino al 16 luglio)
de plu nfurmazions
Due giovani

Youth Alpine Interrail

Descurí les regiuns alpines cun la ferata

Cina ai 20 de ma pó jones y jogn danter 18 y 27 agn davagné öna dles 150 chertes de Youth-Alpine-Interrail por rodé debann y te na manira sostignibla fora por le raiun alpin.

Descurí les Alpes te na manira ecosostignibla - chësc vára da fá cun na cherta de Youth Alpine Interrail (Yoalin). En gaujiun dl iubileum de 50 agn mët l'Arge Alp a desposiziun 50 dles 150 chertes de iade. Da canche Arge Alp é gnüda fondada él dagnora sté tl zënter de süa ativité la mobilité sostignibla y la jonëza. Insciö se dára por ejëmpl da fá por i coliamënc dla ferata sura i confins fora tl raiun alpin.

Tl ann de iubilieum porta inant Arge Alp, la Comunité de laur dles regiuns alpines, sot la presidënza dl Land Tirol, na ligna de proiec che se dá jö cun la sconanza dl clima y le svilup sostignibl tl raiun dles Alpes. Lapró tochel por ejëmpl le pest por la sconanza dl clima, l'impëgn por bosć da munt che ti fej bun al clima o cursc sön les lovines tles scores y n curs por la sconanza dl terac.

Festa Arge-Alp de jügn a Landeck

Cun les chertes Yoalin n'án nia ma la poscibilité da rodé fora por le raiun alpin mo ince da tó sö contat cun d'atra jënt jona. Les 150 porsones che tol pert vëgn sambëgn inviades ala fin de jügn a Landeck ala manifestaziun de daurida ofiziala che vëgn tignida tl cheder dla festa Arge-Alp. La festa Arge-Alp pîta la poscibilité da imparé a se conësce y magari fá deboriada programs de iade. Implü él a desposiziun te osta regiun porsones che á bele n iade tut pert a Yoalin por l'acompagnamënt de iade o de escurjiuns.

Fá domanda cina ai 20 de ma dl 2022 

Les domandes mëss gní fates por inglesc y menades inant cina ai 20 de ma dl 2022 sot a  www.yoalin.org. Chiló él ince da ciafé tröpes d'atres informaziuns, impresciuns dles ediziuns da denant y sambëgn ince consëis d'ütl y material cartografich. Por che che tol pert a chësc iade vëgnel ince preodü entrades miú marcé te museums y cinamai ofertes debann te istituziuns desvalies. Les porsones che tol pert vëgn inviades da cunté de so iade ti social media y ortié inant sües fotografies y stories pro n concurs. La premiaziun gnará fata pro la manifestaziun de conclujiun de otober tla Svizera. 

Informaziuns sön Yoalin

La Consulta dla jonëza dla Comisciun por la proteziun dles Alpes internazionala CIPRA y CIPRA International se dá da fá sciöche portadus dl proiec Yoalin por promöie na modalité da rodé tles Alpes te na manira economica y ecosostignibla. Yoalin vëgn promoiü dai stac che á firmé la Convenziun dles Alpes y sostigní dal punt de odüda finanziar dal Ofize federal svizer por le svilup dl teritore ARE, da Arge Alp, dal Ministere austriach dla sconanza dl clima, ambiënt, energia, mobilité y tecnologia, dal Ministere federal todësch por l'ambiënt, la sconanza dla natöra, la segurté nucleara y la sconanza di consumadus y dal Ofize por l'ambiënt dl Liechtenstein. (LPA)

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.