En jöbia ai 7 de jená pëia indô ia l'insegnamënt en presënza tles scores altes. Te döta la provinzia vëgnel metü a desposiziun, en conscidraziun dles desposiziuns varëntes porvia dl'emergënza gaujada dal Coronavirus y dles limitaziuns de capazité, rodunt 180 bus surapró por garantí le trasport dles scolares y di scolars y l'organisé a na moda sigüda.
Le departimënt provinzial por la mobilité, i tecnics dl Ofize Trasport de porsones y dla STA s'á cruzié les edemes passades cun i conzescionars, les scores y le Comissariat dl Govern, da organisé le miú che ara vá i sorvisc de trasport di scolars. Por lauré fora le trasport s’án anuzé de n'analisa detaiada di dac de obliteraziun da d'altonn dl 2020. Le resultat: por jí zoruch al insegnamënt en presënza él dai 7 de jená inant 180 bus surapró sön les linies desvalies, por le plü corieres che fej vigni de rodunt 380 iadi surapró.
Sön chisc bus, che vëgn ajuntá a chi sön le plan anual normal, él scrit che al se trata dl trasport scolastich surapró y ai pó ma gní anuzá da scolares y scolars y studëntes y studënc, chël ó dí ma da che che á l'abo+. Ti bus extra por les scolares y i scolars, olache al n'é nia i aparac da obliteré, tlechel da mostré l'abo+.
Deboriada cuntra le Corona - Sëgn ince straufunghes
Por arjiné finalmënter le Coronavirus y ti conzede indô ala jonëza da jí a scora do tröpes edemes, messunse düc se dé deboriada da fá. Porchël le apel ala jonëza y a dötes les porsones che vá cun chisc bus:
- anuzesse aladô dles poscibilités da tó tres le medemo bus y dantadöt da tó chi ajuntá surapró. Chësc alisirëia l'organisaziun di tröc iadi surapró y dëida mioré les singoles linies, sce al vá debojëgn;
- che che é flessibl dess ciaré da tó i bus che ne vá nia ti orars zentrai, por garantí na destribuziun balanzada dl numer de passajiers;
- ti mesi de trasport publics velel inant regoles de segurëza rigoroses por se stravardé dal Coronavirus. An mëss dagnora se vistí la maschera, sides tratan le iade che canche an sënta sö y jö, y respeté la destanza de segurëza. Les edemes che vëgn gnarál controlé dassënn. Danü él che le personal de control pó straufé che che ne se tëgn nia ales desposiziuns por arjiné le Coronavirus.