Zënza chëstes ne jissera nia plü da s'imaginé la vita da vigni de dla mobilité: la plata web südtirolmobil y l’app registrëia mesanamënter 50.000 domandes sön i orars al de, i dis da n gran noto ince passa 70.000.
Dan da avisa dui agn unse presenté por le pröm iade nosta app adöm cun la plata web conzepida danü. Da dailó inant él chersciü te na manira costanta le numer dles anuzadësses y di anuzadus che chërda sö la plata y l’app de südtirolmobil y nos s'un porvé da mioré y amplié tresfora les ofertes de informaziun y sorvisc - ince por mirit de üsc consëis.
Cun l’app tres "up to date"
Intratan s'á südtirolmobil etablé sciöche pröm post de consultaziun por dötes les informaziuns che reverda la mobilité publica dl Südtirol. Ti ultimi dodesc mësc é ma l’app gnüda adorada plü co 6,7 miliuns de iadi da 218.000 user. Le maiú numer de anuzadësses y anuzadus é gnü registré dal'informaziun sön i orars online. Danz n valgügn, che ê impröma bindebó scetics, sá sëgn da adoré indortöra les funzionalités y ince cotan de jënt de na certa eté s'á infidé da se desćiaré l’app.
Sambëgn vëgnel ince arjunt tröpa jënt da nüsc avisc-push, cun chi che i ves informun ativamënter, debota y diretamënter sön les linies y les architades che ves interessëia. Ti ultimi 12 mëisc á nüsc user ciafé nia manco co 3,3 miliuns de avisc-push singui.
Le dagní é le mobilie ticketing
Cun la convalidaziun online dl Südtirol Pass y la cumpra online dles chertes por le nightliner introdüta impormó dan da püch á südtirolmobil fat i pröms vari devers dl mobile ticketing. Te püc mëisc sarál poscibl da cumpré online na bona pert dles chertes de südtirolmobil. Por dötes les porsones che s’anüza di mesi publics ó chësc dí na grandiscima flessibilité da adoré i mesi dl trasport local publich y ince na gran independënza dai automac dles chertes y dai aparac de convalidaziun.
Plata web: les tabeles di orars vëgn consultades ion
Gnanca nosta plata web ne pó se baudié: mesanamënter vëgnera cherdada sö 7500 iadi al de, prësc 1,2 miliuns de porsones á cliché lassura plü co 2,7 miliuns de iadi ti ultimi 12 mëisc. Le majer interes vëgn tres ciamó desmostré por nostes tabeles di orars tl format PDF che vëgn tresfora atualisades, é tleres y porchël dër d'öga.
Plataforma por düc i sorvisc online dl Südtirol Pass
Tres nosc portal dl Südtirol Pass sön nosta plata web ti pón ince pormez a düc i sorvisc online por ci che reverda le Südtirol Pass y i abonamënc tl trasport local publich. Insciö vëgnel registré vigni mëis danter 30.000 y 40.000 login tl portal Südtirol Pass . Na dërta afluënza vëgn vigni ann registrada tl scomenciamënt dl ann de scora, canche ara se trata da fá domanda o arlungé online incër 70.000 abo+.
Te vigni caje: i te acompagnun ion ince tl dagní sön tü trus y i te tignun - tan bun che ara vá - mobil y informé/informada indortöra.