Incö (19 de jená) á la Junta provinziala aprové le program anual 2021 dla sozieté inhouse STA – Strotöres Trasport dl Südtirol SpA y mët a desposiziun 15,7 miliuns de euro por les ativités corëntes.
La maiú pert de chësc contribut, y plü avisa 10,8 miliuns de euro, vëgn adorada por ativités desvalies corëntes dla STA. Lapró tochel i sistems d’informaziun tl setur dla mobilité publica, la gestiun dl Südtirol Pass, la metüda a desposiziun di orars pro les fermades, le svilup di sistem d’informaziun sön i orars y cotan deplü. D’atres priorités é implü ince la manutenziun ordinara dles staziuns dla ferata, dles remises y de imobiliars desvalis sciöche ince scomenciadies tl setur dla mobilité sostenibla (Green Mobility) y dla segurëza sön strada tl Safety Park gestí dala STA. 4,9 miliuns de euro dl contribut provinzial ala STA gnará adorá por la gestiun dl’infrastrotöra dla ferata dla Val Venosta.
Seturs de competënza desvalis
“La mobilité publica y smart é le setur prinzipal dla STA; tl zënter él n svilup sostenibl, cualitatif y de bona cualité y ince l’ampliamënt dl’oferta” dij Daniel Alfreider, vizepresidënt dla Provinzia y Assessur por la Mobilité. I seturs de competënza é dër desfarënc y vá dala gestiun dla ferata dla Venosta al svilup di sorvisc d’informaziun y di sistems de dac tl trasport local publich cina al svilup y ala realisaziun de proiec dla ferata moderns. Danter les inciaries che toca tl portfolio dla STA él ince la gestiun de imobiliars y de frabicac funzionai por le trasport local publich y ince mosöres por na mobilité plü sostenibla y sigüda.