Al é gnü lascé alsavëi les gradatöres provisores por i 10 loc dla bandida dl trasport extraurban cun bus. 17 dites á fat para y dé jö 44 ofertes.
L’aministraziun provinziala ti á lascé alsavëi dan da püch ales porsones interessades les gradatöres provisores por i 10 loc dla bandida por la surandada dla conzesciun di sorvisc de trasport publich de linia extraurban cun bus de competënza dla Provinzia de Balsan. Indöt él gnü dé jö cina ai 8 de jügn 44 ofertes por i 10 loc da pert dles 17 aziëndes o grups de aziëndes, 5 de chëstes cun la sënta defora dal Südtirol. Do avëi dé jö les ofertes á la staziun apaltanta valuté les ofertes aladô di criters scric dant.
Sciöche i savun tol ite la bandida europeica daurida ala fin de forá, sorvisc por 21 miliuns de km al ann, por n valur de indöt 714 miliuns de euro, por n tëmp de diesc agn. Vigni aziënda o grup á podü tó pert a düc i diesc loc, mo cun na limitaziun por ci reverda la surandada de alplü trëi di diesc loc dla bandida por vigni partezipant. Les conzesciuns nöies messess pié ia dai proscimi mëisc.
Dla reorganisaziun di sorvisc s’á cruzié la Repartiziun Mobilité y l'Agenzia por i apalc, cun la consulënza di esperc nazionai y internazionai, sciöche ince de organisaziuns y autorités nazionales importantes sciöche AGCM, ART y ANAC. Dlungia les normes europeiches (Regolamënt UE n. 1370 dl 2007) vëgnel apliché a chësc setur ince la lege provinziala sön la mobilité y le codesc sön i apalc.
Aladô dla Provinzia él gnü fat n ater vare important devers dla reorganisaziun y dl mioramënt dl sorvisc de trasport publich tl Südtirol. La partezipaziun ala bandida desmostra le livel alt d’interes y se möi tla direziun da garantí n sorvisc de trasport publich cun le bus che sides de gran cualité, sostignibl, iüst y smart.
I proscimi vari do la comunicaziun dles gradatöres provisores é sëgn le control de ofertes demorvëia basses eventuales, i controi ex. art. 80 y di recuisic de partezipaziun. Do le termin de sospenjiun pón jí inant cun la surandada y i contrac.
Les gradatöres provisores é tl documënt injunté a chësc comunicat.