L’ann dl Corona 2020 á ince lascé sü fostüs pro i numeri de che che vá cun i mesi publics: porvia dles gran limitaziuns s’á, en confrunt a denant, ma le mez dles porsones anuzé dl bus y dla ferata. Mo ciamó n iade án odü che an ne pó nia renunzié ala mobilité publica.
Dl 2020 él gnü obliteré 30,2 miliuns de iadi na cherta di mesi publics dl Südtirol, chël é feter le 45 porcënt demanco co l’ann denant, canche al é sté 54,4 miliuns de obliteraziuns arjunjon le valur mascimal nü y le livel costant nü di ultims agn.
Sön la ferata regionala él sté feter 5,3 miliuns de obliteraziuns, deperpo che denant n’êl passa 10 mil. La situaziun pro i bus é feter anfat: i bus regionai á registré dl 2020 indöt 13,2 miliuns de obliteraziuns, l’ann denant n’él sté 22,9 miliuns. Pro i bus dla SASA él gnü fat 10,5 miliuns de obliteraziuns impede i 19,3 miliuns da denant.
I numeri plü basc de passajiers unse albü tratan le pröm lockdown da merz cina al scomenciamënt de ma dl 2020. Te chëstes edemes êl gnü smendrí cotan l’oferta de bus y ferata. De lugio/agost y dantadöt de setëmber êl spo cotan plü porsones sön le iade cun i mesi publics.
Sce tratan la crisa dl Corona gnôl baié de laurs “relevanc por le sistem” án ince pro i mesi publics odü dantadöt ti ultims tëmps che la mobilité publica é n pilaster fondamental por le funzionamënt de nosta economia y sozieté. Anfat sce al é la pandemia dl Corona o burt temp, le homeoffice y le smart working ne reverda nia al momënt i ciafers di bus y i mascinisć.