Error message

Notice: Undefined index: disabled_javascripts in eu_cookie_compliance_page_build() (line 306 of /var/WebServices/home/www/Virtual-Hosts/www.sii.bz.it/sites/all/modules/eu_cookie_compliance/eu_cookie_compliance.module).

Sanziuns a ciaria dles passajiers y di passajiers di sorvisc de trasport publich

Articul 50, Lege provinziala di 23 de novëmber dl 2015, n. 15

Coma 1  - Che che adora i sorvisc de trasport publich de linia mëss respeté les desposiziuns preodüdes dal titul II dl decret dl Presidënt dla Republica di 11 de messé dl 1980, n. 753, y mudaziuns suandëntes. Che che vá cuntra chëstes desposiziuns, mëss paié la sanziun aministrativa preodüda, aumentada dl 300 porcënt, tl respet de ci che é preodü da chësc articul.

Coma 2 - Che che ne se tëgn nia ales desposiziuns sön la sconanza dla sanité de che che ne föma nia mëss paié les sanziuns aministratives preodüdes dala lege provinziala di 3 de messé dl 2006, n. 6.

Coma 3 - Che che danejëia o ajiëia i mesi de trasport, i locai, les staziuns y les fermades dl trasport publich, sciöche ince so aredamënt y sü azessurs, mëss paié na sanziun aministrativa da 100,00 euro a 600,00 euro, tl respet dles desposiziuns penales y dla refata di dagns.

Coma 4 - Sce l’utënt se comporta a na moda da danejé la segurëza y regolarité dl sorvisc de trasport publich, sciöche ince l’incolumité dles atres passajieres y di atri passajiers, pó le personal inciarié dl control y la ciaferia/le ciafer dl meso, sce ai mina, trá zoruch le titul de iade, sce al é a so inom, y ne lascé nia jí inant chësta porsona sciöche al vëgn preodü dala lege.

Coma 5 - Che che adora i sorvisc de trasport de linia zënza titul de iade regolar mëss paié le prisc dla cherta ordinara de n iade scëmpl y na sanziun aministrativa da 30,00 euro a 240,00 euro.

Coma 6 - Che che adora i sorvisc de trasport de linia cun le titul de iade nominatif zedü o le titul de iade falsifiché y che che vëgn abiné söl fat che ara/al dá inant n titul de iade nominatif, mëss paié le prisc dla cherta ordinara de n iade scëmpl y na sanziun aministrativa da 60,00 euro a 400,00 euro, tl respet dles desposiziuns penales. L’adoranza de n titul de iade nominatif zedü y la constataziun dla falsificaziun dl titul de iade comporta te vigni caje la retrata dla cherta de iade da pert dl personal inciarié dl control.

Coma 7 - La sanziun aministrativa preodüda dal coma 5 vëgn anulada sce:

a) l’utënt che á n titul de iade a tëmp varënt a so inom cun tarifa forfetara (Südtirol Pass abo+, Südtirol Pass 65+ und Schulpass) o n titul de iade debann (Südtirol Pass
free)
, mo che tol i sorvisc de trasport publich zënza avëi para le titul de iade, desmostra al’aziënda che pîta le sorvisc, te cin' dis dal fat, che al á le titul de iade y se crüzia ince tl medemo tëmp da paié, cun les modalités stabilides dal’aziënda, la soma de 10,00 euro sciöche spëises aministratives;

b) l’utënt che á n titul de iade varënt cun inom, mo che tol i sorvisc de trasport publich zënza mostré n documënt d'identificaziun varënt eventualmënter scrit dant, desmostra al’aziënda che pîta le sorvisc, te cin' dis dal fat, süa identité y se crüzia ince tl medemo tëmp da paié, cun les modalités stabilides dal’aziënda, la soma de 10,00 euro sciöche spëises aministratives;

c) l’utënt che á n titul de iade a tëmp varënt cun inom cun tarifa forfetara (Südtirol Pass abo+, Südtirol Pass 65+ und Schulpass) o n titul de iade debann (Südtirol Pass
free)
, mo ne l'á nia convalidé, regolarisëia süa posiziun atira o te cin' dis dala contestaziun paian, cun les modalités stabilides dal’aziënda, la soma de 10,00 euro sciöche spëises aministratives.

Coma 8 - La sanziun aministrativa preodüda dal coma 6 vëgn anulada, sce l’utënt che á n titul de iade a tëmp varënt a so inom cun tarifa forfetara, tol i sorvisc de trasport publich cun n titul de iade a tëmp nominatif cun tarifa forfetara de n ater componënt familiar, ti desmostra al’aziënda che pîta le sorvisc, te cin'dis dal fat, che al á so titul de iade y se crüzia ince tl medemo tëmp da paié, cun les modalités stabilides dal’aziënda, la soma di 10,00 euro sciöche spëises aministratives.

Coma 9 - Ti caji preodüs dai comesc 5 y 6 pó l’utënt regolarisé süa posiziun atira o te cin' dis dala contestaziun, tres le paiamënt de na soma anfat ala soma dla cherta ordinara de n iade scëmpl, plü la sanziun te na mosöra minimala.

Coma 10 - Sce le paiamënt ne vëgn nia fat aladô di comesc da denant, ortiëia inant la porsona responsabla dl control inciariada dal’impresa de trasport, che á azerté y contesté la violaziun, le verbal d'azertamënt al rapresentant legal dl’impresa che eserzitëia le sorvisc de trasport, che desponn l’ordinanza de paiamënt dla straufunga.

Coma 11 - Ci che vëgn trat ite cun les sanziuns aministratives ti speta ales impreses de trasport. Le 50 porcënt de ci che vëgn trat ite mëss gní tut por mioré les ativités de control y d'assistënza por les passajieres y i passajiers y les informaziuns sön le sorvisc y i punc de venüda, sön la basa de n program che les impreses de trasport mëss presenté vigni ann.

Coma 12 - Les somes dles sanziuns preodüdes da chësc articul pó gní adatades vigni ann dala Junta provinziala ales mudaziuns dl cost dla vita aladô di dac ASTAT.

Link: