Passaje dal Südtirol Pass family al EuregioFamilyPass Südtirol

De juni 2017 giaperà chi che à bele l Südtirol Pass family o l Südtirol Pass a tarifa familia tres posta, automaticamënter y debant, l EuregioFamilyPass Südtirol nuef.
L EuregioFamilyPass Südtirol remplazea l Südtirol Pass family atuel o l Südtirol Pass a tarifa familia.

De mpurtanza:

Dan unì adurveda sun i mesuns de trasport publich local muessa la cherta nueva unì ativeda online. L ie da dé sëura l numer dl EuregioFamilyPass Südtirol persunel y l codesc fischel. Chësc ie de bujën per l cunsëns al tratamënt di dac persunei coche cherta vantajes.

     
ATIVAZION ONLINE
     

Do l'ativazion dl EuregioFamilyPass Südtirol pudëssel, per rejons tecniches, passé mpue de tëmp dan che n l posse adurvé tl trasport publich local. Cunsion perchël, ti prim dis do la sostituzion dla cherta, de tò pea nce l vedl Südtirol Pass family.
Cun l'ativazion unirà i chilometri madurei, l scialier tarifer curespundënt y l credit eventuamënter avanzà trasferii automaticamënter sun l EuregioFamilyPass Südtirol.


Nchin che l EuregioFamilyPass Südtirol ne vën nia ativà possen adurvé l “vedl” Südtirol Pass family tl trasport publich local; ma canche l destoma do n ann vëniel aplicà automaticamënter la tarifa normala dl Südtirol Pass.


La tarifa familia dl EuregioFamilyPass Südtirol valerà nchin al 18ejim cumpliani dl mut/dla muta plu jëunn/jëuna; a chësta maniera scaterà l passaje ala tarifa standard dl Südtirol Pass automaticamënter canche l mut plu jëunn /la muta plu jëuna à arjont la majera età y NIA plu canche la validità anuela vën renuveda.
Sambën unirà i chilometri fac mantenii y pona calculei aldò dla tarifa chilometrica nueva dl scialier tarifer curespundënt.


Per cie che reverda l'adurvanza dla cherta nueva tl trasport publich local ne mudel nia sce cunfruntà cun l Südtirol Pass family. La nuvità ie bel scëmpl chëla che l ne se trata nia plu mé de na cherta de viac, ma nce de na cherta vantajes che pieta alesiramënc te butëighes y strutures per l tëmp liede defrëntes tl Südtirol. Liej deplù sun l EuregioFamilyPass Südtirol nuef...

Chi che à n Südtirol Pass a tarifa normala y che arà l dërt ala tarifa familia per la nasciuda de n mut/na muta, puderà damandé online y debant l EuregioFamilyPass Südtirol. L ne sarà te chësc cajo deguna spëises d’amiscion.

     
DUMANDA ONLINE